Білім жаңалықтары
03.09.2026 | 23
«Саламатты мектеп»: Қазақстан мектептерінде денсаулықты сақтауға ықпал ететін орта қалай қалыптастырылуда
«Саламатты мектеп»: Қазақстан мектептерінде денсаулықты сақтауға ықпал ететін орта қалай қалыптастырылуда
Қазақстанда білім беру ұйымдарында оқушылардың физикалық, психикалық және әлеуметтік әл-ауқатын қамтамасыз ететін қауіпсіз әрі қолайлы орта қалыптастыруға бағытталған «Саламатты мектеп» жобасы жүзеге асырылуда.
Оқушылардың денсаулығы - ортақ жауапкершілік
Балалардың денсаулығын нығайту тек мектептің, отбасының немесе денсаулық сақтау жүйесінің міндеті бола алмайды. Бұл үшін педагогтердің, медицина қызметкерлерінің, мектеп психологтерінің, ата-аналардың, білім беру және денсаулық сақтау органдарының бірлескен іс-қимылы қажет.
Мұндай тәсіл Дүниежүзілік денсаулық сақтау ұйымының «Денсаулықты нығайтуға ықпал ететін мектептер» бастамасына сәйкес келеді. Бұл бастама аясында мектеп барлық қатысушылары балалардың денсаулығы мен әл-ауқатын қолдайтын жағдайларды бірлесіп қалыптастыратын тұтас қауымдастық ретінде қарастырылады.
Қазақстанда аталған қағидаттар «Саламатты мектеп» жобасы аясында іске асырылуда. 2026 жылы Денсаулық сақтау министрлігі мен Оқу-ағарту министрлігі жобаны 2026-2028 жылдары іске асыру жөніндегі бірлескен жоспарды бекітті. Жоспарда ұлттық, өңірлік және мектеп деңгейлеріндегі міндеттер айқындалып, барлық қатысушылардың үйлесімді жұмысын ұйымдастыру көзделген.
«Саламатты мектеп» жобасы оқушылардың денсаулығы мен әл-ауқатына әсер ететін негізгі бағыттарды біріктіреді:
- дене белсенділігі;
- дұрыс тамақтану;
- психикалық денсаулық;
- буллингтің алдын алу;
- мінез-құлықтық қауіп факторларының алдын алу;
- санитариялық қауіпсіздік;
- медициналық және психологиялық көмекке қолжетімділік;
- мектептің ата-аналармен өзара іс-қимылы.
Бұл жекелеген дәрістер, спорттық іс-шаралар немесе бір реттік акциялар туралы ғана емес. Негізгі міндет - мектептегі күнделікті ортаны жүйелі түрде жақсартып, денсаулыққа қамқорлық жасауды мектеп өмірінің қалыпты бір бөлігіне айналдыру.
Педагогтер қалай қатысады
Педагогтер күн сайын сыныптағы ахуалға, психологиялық қауіпсіздік деңгейіне және балалардың мектепке деген көзқарасына ықпал етеді. Олардың қатысуы өзара құрметке негізделген ортаны қалыптастыруды, буллингтің алдын алуды, дене белсенділігін қолдауды, денсаулық туралы сенімді ақпаратты пайдалануды, сондай-ақ балаға көмек қажет болған жағдайда оны медицина қызметкеріне немесе психологке уақтылы бағыттауды қамтуы мүмкін.
Сонымен қатар денсаулыққа қамқорлық жасау педагогтер үшін жеке формалды міндетке айналмауға тиіс. Жобаның қағидаттары мектеп саясатына, білім беру тәжірибесіне және күнделікті қалыптасқан үдерістерге біртіндеп енгізілуі қажет.
Ата-аналардың қатысуы неліктен маңызды
Жобада ата-аналар тек ақпарат алушылар ретінде ғана емес, мектеп қауымдастығының толыққанды мүшелері ретінде қарастырылады. Оларды тарту дұрыс тамақтану, дене белсенділігі, қауіпсіз мінез-құлық және психологиялық қолдау қағидаттарының тек мектепте ғана емес, үй жағдайында да сақталуы үшін қажет.
Ата-аналар мектептегі тамақтану жағдайларын, қауіпсіздікті, психологиялық ахуалды және балалардың әл-ауқатына қатысты басқа да мәселелерді талқылауға қатыса алады. Сондай-ақ олар кері байланыс беріп, мектеппен бірлесіп нақты білім беру ұйымына сәйкес келетін шешімдерді іздей алады.
Жобаның цифрлық платформасы
Жобаны іске асыру үшін бірыңғай алгоритм, көрсеткіштер жүйесі және цифрлық платформа әзірленді. Оның көмегімен мектептер өзін-өзі бағалау жүргізіп, жоспарланған іс-шаралардың орындалуын қадағалай алады.
Өңірлер мен жоба үйлестірушілері жобаның іске асырылу барысын талдауға, жұмыс сапасын бағалауға және мектептерге қандай әдістемелік қолдау қажет екенін анықтауға мүмкіндік алады.
«Саламатты мектеп» бастамасы, оның бағыттары және мектептердің қатысуы туралы толығырақ ақпаратты ресми платформадан алуға болады:
-
-
01.09.2026 | 20
Жаңа оқу жылы: Қазақстанда 57 жаңа мектеп ашылды