Білім жаңалықтары
03.09.2026 | 41
«Тең - теңіне»: жас еріктілер денсаулы туралы түсінікті тілді айтуға қалай көмектеседі
«Тең - теңіне»: жас еріктілер денсаулы туралы түсінікті тілді айтуға қалай көмектеседі
Кейде жасөспірімдерге өздерін алаңдататын мәселелер туралы ересек адаммен сөйлесу қиын болады. Мұндай кезде достарымен, құрдастарымен немесе өздерімен жасты, ұқсас жағдайларды бастан өткеруі мүмкін адамдармен сөйлесу оңайырақ.
«Тең - теңіне» қағидаты осыған негізделген: арнайы даярлықтан өткен жас еріктілер құрдастарына денсаулық туралы сенімді ақпарат алуға, маңызды тақырыптарды қысымсыз талқылауға және кәсіби көмек алу үшін қайда жүгінуге болатынын білуге көмектеседі.
Еріктілер немен айналысады
Тиісті даярлықтан өткеннен кейін жас еріктілер:
- құрдастарына саламатты өмір салты туралы ақпарат бере алады;
- тексерілген профилактикалық материалдарды тарата алады;
- жасөспірімдерді Жастар денсаулық орталықтарының мүмкіндіктерімен таныстыра алады;
- адамды психологке, дәрігерге немесе басқа маманға бағыттай алады.
Бұл тәсілдің артықшылығы – ақпараттың жастарға түсінікті тілде жеткізілуі. Әңгіме ақыл айту түрінде емес, өзара құрметке негізделген қарым-қатынас және білім алмасу форматында өтеді.
Ерікті маманды алмастырмайды
Еріктінің рөлі мен өкілеттігінің шегін түсіну маңызды.
«Тең - теңіне» қағидаты бойынша жұмыс істейтін ерікті:
- диагноз қоймайды;
- ем тағайындамайды;
- психологиялық терапия жүргізбейді;
- жеке ақпаратты ашуды талап етпейді;
- тексерілмеген медициналық кеңестер бермейді;
- дағдарыстық жағдайды өз бетінше шешуге тырыспайды.
Оның міндеті - адамды айыптамай тыңдау, тексерілген ақпаратпен бөлісу және кәсіби қолдау табуға көмектесу.
Егер жағдай өмірге төнген қауіппен, зорлық-зомбылықпен, ауыр психологиялық дағдарыспен немесе денсаулық жағдайының күрт нашарлауымен байланысты болса, мүмкіндігінше тезірек білікті маманға немесе шұғыл көмек қызметіне жүгіну қажет.
Еріктілер нені үйренеді
Мұндай жұмысқа қатысу үшін тек көмектесуге деген ниет жеткіліксіз. Еріктілер арнайы даярлықтан өтуі қажет. Ол мыналарды қамтуы мүмкін:
- мейірімді әрі ізгі қарым-қатынас жасау дағдылары;
- топтық кездесулер өткізу;
- сенімді ақпаратпен жұмыс істеу қағидалары;
- жеке шекаралар мен әдеп нормалары;
- құпиялылық;
- маманның көмегін қажет ететін жағдайларды анықтау.
Мұндай даярлық еріктіге өзге жастар үшін де, өзі үшін де қауіпсіз түрде көмек көрсетуге мүмкіндік береді.
Жастардың қатысуы неліктен маңызды
Жастар өз құрдастарын қандай мәселелер алаңдататынын, кейбір тақырыптардың неліктен ыңғайсыздық туғызатынын және қандай қарым-қатынас форматтарының жеңіл қабылданатынын жақсы түсінеді.
Еріктілік қызметке қатысу еріктілердің өздеріне де қарым-қатынас жасау, көпшілік алдында сөйлеу, командада жұмыс істеу, жауапкершілік пен көшбасшылық дағдыларын дамытуға көмектеседі.
Қатысу мүмкіндіктері туралы қалай білуге болады
Еріктілерді қабылдау тәртібі өңірге және нақты Жастар денсаулық орталығына байланысты әртүрлі болуы мүмкін.
Қолжетімді мүмкіндіктер туралы білу үшін:
- Өзіңізге жақын орналасқан ЖДО-ны табыңыз.
- Орталықтың үйлестірушісімен байланысыңыз.
- Қатысу шарттарын, талаптарды және оқыту тәртібін нақтылаңыз.
ЖДО-лардың мекенжайлары мен байланыс деректерін осы жерден немесе QR-кодты сканерлеу арқылы табуға болады:
«Тең - теңіне» қағидаты дәрігерлерді, психологтерді немесе педагогтерді алмастыруға бағытталмаған. Бұл денсаулық туралы сенімді ақпаратты жастарға жақын әрі түсінікті етуге, ал кәсіби көмекке жүгінуді қалыпты және табиғи әрекетке айналдыруға мүмкіндік береді.
-
-
01.09.2026 | 20
Жаңа оқу жылы: Қазақстанда 57 жаңа мектеп ашылды